တၢင်းပဵၼ်လၢၵ်ႇလၢႆး ႁွင်ႉ တိၼ် မိုဝ်း သူပ်း(ပၢၵ်ႇ)

ၸိုင်ႈထႆး တူင်ႉတိုၼ်ၵူဝ်တၢင်းပဵၼ် တိၼ်မိုဝ်းသူပ်း(ပၢၵ်ႇ) ဢၼ်လုၵ်ႉတီႈမိူင်းၵမ်ႇပူးၶျႃႊ ၽႄႈတိုၼ်းမႃးၼႂ်းမိူင်းထႆး ၸွမ်းလႅၼ်လိၼ်ဢၼ်တိတ်းၸပ်းမိူင်း ၵမ်ႇပူးၶျႃႊ။

တၢင်းပဵၼ်ဢၼ်ၼႆႉ ငၢႆးမိူၼ် မၢၵ်ႇလႅင် သေ ဢွၵ်ႇၸွမ်းတိၼ် မိုဝ်း သူပ်းလႄႈႁူဝ်တႃၸိူဝ်းၼႆႉ။ ပူၼ်ႉမႃး ပႆႇႁိုင်ၼႆႉ လုၵ်ႈဢွၼ်ႇၼႂ်းမိူင်းၵမ်ႇပူးၶျႃႊ တၢႆယွၼ်ႉတၢင်းပဵၼ်ဢၼ်ၼႆႉၼမ်ၶိုၼ်ႈမႃးၼႆလႄႈ ၸုမ်းပၢႆးယူႇလီလုမ်ႈၾႃႉ    World Health Organization (WHO) ၶဝ်မႃးၸႅတ်ႈထတ်းတူၺ်းလႆႈႁူႉဝႃႈ လုၵ်ႈဢွၼ်ႇဢမ်ႇလႆႈတၢႆယွၼ်ႉတၢင်း ပဵၼ် တိၼ်မိုဝ်းသူပ်း ၼႆယဝ်ႉ။

လွင်ႈတၢင်းဢၼ်ႁဵတ်းႁႂ်ႈလုၵ်ႈဢွၼ်ႇလႆႈလုတၢႆၼၼ်ႉ  ပဵၼ်ယွၼ်ႉတၢင်းပဵၼ်ၸိူဝ်ႉမႅင်း ဢၼ်ၼိုင်ႈဢၼ်ႁွင်ႉဝႃႈ  EV 71 ၼၼ်ႉၼႆယဝ်ႉ။ ၸိူဝ်ႉမႅင်းၼႆႉယၢမ်ႈၽႄႈတိုၼ်းၼႂ်းမိူင်းထႆးမႃးမိူဝ်ႈဢွၼ်တၢင်းသေ ၽၢႆႇပၢႆးယူႇလီ မိူင်းၵမ်ႇ ပူးၶျႃႊ လၢတ်ႈဝႃႈၸိူဝ်ႉမႅင်းဢၼ်ၼႆႉ ထူပ်းႁၼ်ၼႂ်းၵုၼ်ဢေးသျႃႊ  ၵူၺ်းၵႃႈမိူင်းၵမ်ႇပူးၶျႃႊ ဢမ်ႇတွၼ်ႉမီးၸိူဝ်ႉမႅင်း ဢၼ် ၼႆႉမႃးသေပွၵ်ႈဝႃႈၼႆ။


ၼႂ်းၸိုင်ႈထႆးၵေႃႈ ၸုမ်းၽၢႆႇပၢႆးယူႇလီၶဝ် သင်ႇလူင်းႁႂ်ႈၸဝ်ႈၼႃႈတီႈ ႁွင်ႈၵၢၼ်ပၢႆးယူႇလီ ႁႂ်ႈႁေႉၵင်ႈ တၢင်းပဵၼ် ဢၼ်ၼႆႉ ၵူႈ ၸႄႈတွၼ်ႈသေ ၸႄႈတွၼ်ႈဢၼ်တိတ်းၸပ်း မိူင်းၵမ်ႈပူးၶျႃႊၼၼ်ႉ လူဝ်ႇလႆႈဝႆႉ သတိယႂ်ႇလူင်တေႉ တေႉၼႆယဝ်ႉ။

တၢင်းၽၢႆႇၸုမ်းပၢႆးယူႇလီမိူင်းထႆးလၢတ်ႈဝႃႈ လုၵ်ႈဢွၼ်ႇၼႂ်းမိူင်းထႆးပဵၼ်တၢင်းပဵၼ် တိၼ်မိုဝ်းသူပ်း မိုၼ်ႇပၢႆယဝ်ႉ ၼႆ။ ၸိူင်ႉႁိုဝ်ၵေႃႈလီၽူႈတႅမ်ႈဢမ်ႇယၢမ်ႈလႆႈယိၼ်းၸိုဝ်ႈ တၢင်းပဵၼ်ဢၼ်ၼႆႉသေပွၵ်ႈ။ ပီႈၼွင်ႉတႆးၸိူဝ်းယူႇ ၼႂ်း မိူင်းထႆး-မိူင်းတႆး လူဝ်ႇၾၢင်ႉသတိ လုၵ်ႈလၢၼ်ၽႂ်မၼ်းၸွမ်းတၢင်းပဵၼ်ဢၼ်ၼႆႉယူႇ။ သင်ႁၼ်လုၵ်ႈဢွၼ်ႇႁဝ်း ဢွၵ်ႇတုမ်ႇ လႅင် မိူၼ်ၶူမ်း မိူၼ်မၢၵ်ႇလႅင် ၼင်ႇမိူင်းႁဝ်းၼၼ်ႉၼႆၸိုင် ထုၵ်ႇလီဢွၼ်ဢဝ်လုၵ်ႈဢွၼ်ႇၵႂႃႇႁႃမေႃၵမ်း လဵဝ်ယူႇယဝ်ႉ။

တၢင်းပဵၼ်ဢၼ်ၼႆႉ ပဵၼ်ၸွမ်းလုၵ်ႈဢွၼ်ႇၸိူဝ်းဢႃႇယု သၢမ်ၶူပ်ႇလူင်းတႂ်ႈသေ တေမီးတၢင်းပဵၼ်ၸိမ်ၶဝ်ႈ မႃးၸွမ်း မိူၼ်ၼင်ႇလူမ်းၼၢဝ်ၶိုၼ်ႈ လႄႈ ထူၺ်ႈၸႂ်ၵပ်ႉ ၸိူဝ်းၼႆႉၼႆယဝ်ႉ။ ၵမ်ႈၼမ်တေပဵၼ်ၸွမ်းတီႈဢၼ်မီးလုၵ်ႈဢွၼ်ႇ မႃးယူႇၸွမ်းၵၼ်ၼမ်ၼမ်သေ ဢမ်ႇမီးလူမ်းၽၢၼ်ႇၶဝ်ႈဢွၵ်ႇလႆႈလီလီၸိူဝ်းၼၼ်ႉၼႆယဝ်ႉ။ တႃႇႁေႉၵင်ႈမၼ်းတႄႉ သွၼ်ႁႂ်ႈလုၵ်ႈဢွၼ်ႇမေႃယူႇၸွမ်းလွင်ႈမူတ်းသႂ်လႄႈ လၢင်ႉမိုဝ်းႁႂ်ႈ မူတ်းသႂ်ၼၼ်ႉၼႆယဝ်ႉ။