ၸုမ်းၶၢႆၶွမ်းယႂ်ႇသုတ်း ၼႂ်းလုမ်ႈၾႃႉ ယၢမ်းလဵဝ် ၶၢႆၾူၼ်းၼမ်လိူဝ်ၶွမ်း

ၸုမ်းႁဵတ်းဢွၵ်ႇလႄႈၶၢႆၶွမ်းယႂ်ႇလိူဝ်ပိူၼ်ႈသုတ်းၼႂ်းလုမ်ႈၾႃႉ မိူၼ်ၼင်ႇ Lenovo ၼၼ်ႉ ယၢမ်းလဵဝ် ႁဵတ်းဢွၵ်ႇ လႄႈၶၢႆၾူၼ်းၼမ်လိူဝ်ၶွမ်းယဝ်ႉၼႆ။

ၸွမ်းၼင်ႇၽိုၼ်ႁၢႆးငၢၼ်းၶွင်ၸုမ်း Lenovo မိူဝ်ႈဝၼ်းထိ 14/08/14 ပူၼ်ႉမႃးၼၼ်ႉတေႇမိူဝ်ႈ ႁူဝ်ပီၼႆႉ မႃး ၸုမ်း Lenovo ႁဵတ်းလႄႈၶၢႆဢွၵ်ႇၾူၼ်းႁူမ်ႈ 15.8 လၢၼ်ႉၶိူင်ႈ ၼမ်လိူဝ်မိူဝ်ႈပီၵၢႆ 2 ပုၼ်ႈ လႄႈ လႆႈဝႃႈပဵၼ်ပွၵ်ႈဢွၼ် တၢင်းသုတ်းၶွင် Lenovo ဢၼ်ၶၢႆဢွၵ်ႇၾူၼ်းလႆႈၼမ်လိူဝ်ၶွမ်း (ဢၼ်ၶၢႆဢွၵ်ႇတီႈ 14.5 လၢၼ်ႉၶိူင်ႈ) ၼႆယူႇ။

လွင်ႈတၢင်းဢၼ်ႁဵတ်းႁႂ်ႈၶွမ်ႇပႃႇၼီႇႁဵတ်းဢွၵ်ႇၾူၼ်းလုၵ်ႉမိူင်းၶႄႇမိူၼ်ၼင်ႇ Lenovo လႄႈ Huawei လိုဝ်းလင် မႃးလႄႈမီးၵူၼ်းသိုဝ်ႉၸႂ်ႉၼမ်ၼၼ်ႉ ပဵၼ်ယွၼ်ႈၵႃႈၶၼ်ဢၼ်ထုၵ်ႇလိူဝ်ၾူၼ်းတၢင်ႇၸိူဝ်း ၵူၺ်းမီးၽၢင်ႁၢင်ႈႁၢင်ႈလီ လႄႈ ၵၢၼ်ႁဵတ်းၵၢၼ်ဝႆးပဵင်းၾူၼ်းတၢင်ႇၸိူဝ်း မိူၼ်ၼင်ႇ Samsung လႄႈ Motorola ၼႆယူႇ။

ပဵၼ်ႁိုဝ်ၵေႃႈယဝ်ႉ ပေႉသမ်ႉဝႃႈၶၢႆၾူၼ်းၼမ်လိူဝ်ၶွမ်းသေတႃႉၶွမ်းၼၼ်ႉတိုၵ်ႉပဵၼ် ၶွင်ၶၢႆဢၼ် လမ်ႇလွင်ႈသုတ်း ၶွင်ၸုမ်း Lenovo ၵွပ်ႈဝႃႈဢႃႈမႅတ်ႈ 78%  တၢင်းမူတ်းၶွင်ႁူဝ်ပီမႃးၼႆႉ လုၵ်ႉမႃးတီႈ ၶွမ်းဢၼ်လႆႈၶၢႆဢွၵ်ႇၵႂႃႇ ၼႆယဝ်ႉ။