ထတ်းသၢင် Samsung Unpacked 2014

ၼႂ်းပၢင်ပိုတ်ႇတူဝ်ၾူၼ်း လႄႈ ၶိူင်ႈမိုဝ်းတၢင်ႇပိူင်ႁူဝ်ပီ ၶွင်ၸုမ်းသမ်ႊသုင်ႊ (Samsung Unpacked 2014) ပီၼႆႉ မီးၵၢၼ်ပိုတ်ႇတူဝ်ၾူၼ်းမႂ်ႇ လႄႈၶိူင်းမိုဝ်းလၢႆသႅၼ်းဢမ်ႇဝႃႈ Galaxy Note 4 ၊ Note Edge ၊ လႄႈ ယၢမ်း မွင်း (ၼႃႇရီႇ) တူဝ်မႂ်ႇၸၵႂႃႇတၢင်းၼမ်။

မိူဝ်ႈဝၼ်းထိ 3/09/14 ယၢမ်း 8:30 - 9:30 ႁူဝ်ၶမ်ႈၼၼ်ႉ ၸုမ်းသမ်ႊသုင်ႊၸတ်းပၢင် Samsung Unpacked 2014 ၼႂ်းဝဵင်း ပိူဝ်ႊလိၼ်ႊ (Berlin) မိူင်းၵျိူဝ်ႊမႅၼ်ႊၼီႊ (Germany) သေ မီးၵၢၼ်ပိုတ်ႇ တူဝ်ၾူၼ်း လႄႈ ၶိူင်ႈၸႂ်ႉတူဝ်မႂ်ႇလၢႆပိူင်မိူၼ်ၼင်ႇ-

1. Galaxy Note 4  

ၾူၼ်းၶိူဝ်း Galaxy Note ၶွင်ၸုမ်းသမ်ႊသုင်ႊၼၼ်ႉ လႆႈဝႃႈပဵၼ်ၾူၼ်းဢၼ်ၶၢႆလီသုတ်း သႅၼ်းၼိုင်ႈၼႂ်းလုမ်ႈ ၾႃႉသႅၼ်းၼိုင်ႈ။ ၵွပ်ႈၼၼ်မီးၵူၼ်းဢွၼ်ၵၼ်ပႂ်ႉမွင်း Galaxy Note တူဝ်မႂ်ႇၼႆႉ တၢင်းၼမ်။ လိုၼ်းသုတ်း သမ်ႊသုင်ႊ ပိုတ်ႇတူဝ် Galaxy Note 4 ဢၼ်ဢမ်ႇပေႃးမီးၽၢင်ႁၢင်ႈ ပႅၵ်ႇပိူင်ႈ သင်တင်း Note 3 ။ ၵူၺ်းမီး ၵၢၼ်လႅၵ်ႈလၢႆႈၼိူဝ် ၼႃႈၾူၼ်း (screen) ၊ လွင်ႈႁဵၼ်းၵၢၼ်၊ လႄႈ ပူဝ်ႊၵႅမ်ႊတူဝ်မႂ်ႇၼႆယူႇ။

တၢင်းၸႅင်ႈ ၼႃႈၾူၼ်း (screen)    Quad HD (1440 x 2560 pixels)
CPU                                         Quad-core 1.3 GHz ၊ 1.9GHz ၊ လႄႈ 2.7 GHz
RAM                                        3 GB
ပိုၼ်ႉတီႈၵဵမ်းၶေႃႈမုၼ်း                 32GB ထိုင် 64GB
ၵွင်ႈထႆႇ                                     16M
OS                                          Android 4.4.4 KitKat

2. Galaxy Note Edge  

ၼႂ်းပၢင်ႁူပ်ႉထူပ်းၽူႈႁဵၼ်းၵၢၼ်ၽၢႆႇ IT လုမ်ႈၾႃႉ CES ပီ 2013 ၼၼ်ႉ မီးၵၢၼ်ၼႄၾူၼ်း ဢၼ် လၢၵ်ႇလၢႆးလႄႈ ဢမ်ႇမိူၼ်ၽႂ် ၵွပ်ႈဝႃႈမၼ်းမီးၼႃႈၾူၼ်း (screen) ဢၼ်ၵူတ်ႉငေႃးလႆႈၼႆသေ ႁဵတ်း ႁႂ်ႈ ၵူၼ်းတၢင်းၼမ်ဢွၼ် ၵၢၼ်သူၼ်ၸႂ်ပႂ်ႉမွင်းၵၢၼ်ယူႇ။ ၼႂ်းပၢင် Samsung Unpacked 2014 ၼႆႉ ၸုမ်းသမ်ႊသုင်ႊပိုတ်ႇတူဝ်ၾူၼ်း ၼႆႉပဵၼ်တၢင်းၵၢၼ် လႄႈ ႁွင်ႉၸိုဝ်ႈမၼ်းဝႃႈ Galaxy Note Edge ၼႆယူႇ။ တီႈတေႉမၼ်း တၢင်းယႂ်ႇ၊ တၢင်း ဝႆးလွင်ႈႁဵတ်းၵၢၼ်၊ လႄႈပူဝ်ႊၵႅမ်ႊမၼ်းၼၼ်ႉ မိူၼ်ၵၼ် တင်း Note 4 ၵူႈပိူင်။ ၵူၺ်းလွင်ႈဢၼ်ပႅၵ်ႇပိူင်ႈၼၼ်ႉ ပဵၼ်တီႈၼႃႈၾူၼ်းဢၼ်မီးပိုၼ်ႉတီႈ ၵူတ်ႉ ငေႃး လိူဝ်မႃးႁိမ်းၶွပ်ႇၾူၼ်း။ ၶွပ်ႇၾူၼ်းဢၼ်ငေႃးၼႆႉ ႁဵတ်းၽူႈၸႂ်ႉ ၾူၼ်းၶဝ်ၸၢင်ႈဢၢၼ်ႇ ၶေႃႈၵႂၢမ်း၊ တူၺ်းၶၢဝ်းယၢမ်း၊ လႄႈ ဢၢၼ်ႇၶၢဝ်ႇပွတ်းပွတ်းၸၵႂႃႇ လူၺ်ႈဢမ်ႇလူဝ်ႇပိုတ်ႇ ၾူၼ်းတၢင်း သဵင်ႈ။ ၾူၼ်းတူဝ်မႂ်ႇၼႆႉ လၢႆၽၢႆႇယုမ်ႇယမ်ဝႃႈတေပဵၼ်ၾူၼ်းဢၼ်ၶၢႆလီ လႄႈ ပဵၼ်တူဝ်ၶေႉၶဵင်ႇ တင်း  iPhone 6 ဢၼ်တေပိုတ်ႇတူဝ်ၼႂ်းဝၼ်းထိ 09/09/14 ၼႆႉၵမ်းသိုဝ်ႈ ဝႃႈၼႆယူႇ။

3. Samsung Gear S  

လိူဝ်သေၾူၼ်းယဝ်ႉ သမ်ႊသုင်ႊ ယင်းလႆႈပိုတ်ႇတူဝ်ယၢမ်းမွင်းတူဝ်မႂ်ႇၸိုဝ်ႈ Samsung Gear S ဢၼ်မီးၽၢင် ႁၢင်ႈလႅၵ်ႈလၢႆႈ လႄႈ ႁၢင်ႈလီမႃးလိူဝ်ၵဝ်ႇတၢင်းၼမ်။ ယၢမ်းမွင်းတူဝ်မႂ်ႇၼႆႉ ႁဵတ်းၵၢၼ် မိူၼ်ၵၼ်တင်းၾူၼ်းဢၼ် ၽူႈဢၢၼ်ႇၶဝ်တိုၵ်ႉၸႂ်ႉယူႇ။ မၼ်းၸၢင်ႈသူင်ႇၶေႃႈၵႂၢမ်း၊ တူၺ်းဢီႊမေႊ၊ ထွမ်ႇၵႂၢမ်း၊ လႄႈၸႂ်ႉ Facebook ၸၵႂႃႇ။ ပဵၼ်ႁိုဝ်ၵေႃႈယဝ်ႉၸုမ်းသမ်ႊသုင်ႊၸႂ်ႉ OS ဢၼ်တႅမ်ႈၶိုၼ်ႈ ႁင်းၵူၺ်းၸိုဝ်ႈ Tizen ၼိူဝ်ယၢမ်းမွင်းမႂ်ႇၼႆႉ လႄႈ ဢမ်ႇလႆႈၸႂ်ႉ Android။ သမ်ႊသုင်ႊလၢတ်ႈဝႃႈ ယၢမ်းလဵဝ်မီးပူဝ်ႊၵႅမ်ႊ (app) 1000 ပၢႆတႃႇၸႂ်ႉတိုဝ်း ၸွမ်းယၢမ်း မွင်းၼႆႉ ဝႃႈၼႆယူႇ။

4. Samsung VR  

လိူဝ်သေယၢမ်းမွင်းယဝ်ႉ ၶိူင်ႈမိုဝ်း IT ဢၼ်တိုၵ်ႉလိုဝ်းလင်ယူႇယၢမ်းလဵဝ်ၼၼ်ႉပဵၼ် ၶိူင်ႈမိုဝ်းၸိုဝ်ႈ Visual Reality (VR) ဢၼ်ၸုမ်းၶွမ်ႊပႃႊၼီႊယႂ်ႇလၢႆၸုမ်း မိူၼ်ၼင်ႇ Google လႄႈ Sony တိုၵ်ႉ ၶတ်းၸႂ် ႁိပ်ႈႁဵၼ်း ဢွၵ်ႇၼၼ်ႉယူႇ။ ၼႂ်းပၢင် Samsung Unpacked 2014 ၼႆႉ သမ်ႊသုင်ႊ ႁူမ်ႈမိုဝ်း တင်း Facebook သေ ပိုတ်ႇတူဝ် VR ၸဝ်ႈၵဝ်ႇ ဢၼ်ၸႂ်ႉၸိုဝ်ႈဝႃႈ Samsung VR။ ပေႃးလၢတ်ႈ တီႈ ငၢႆႈ မၼ်းၼႆ VR ၼၼ်ႉပဵၼ်မၢၼ်ႇ တႃဢၼ်မိူဝ်ႈၽူႈဢၢၼ်ႇၶဝ်သႂ်ႇသေလဵၼ်ႈၵဵမ်ႊ ဢမ်ႇၼၼ် တူၺ်းငဝ်းတူင်ႉၼၼ်ႉ တေမိူၼ်ဝႃႈၸဝ်ႈၵဝ်ႇၵႂႃႇယူႇၼႂ်းၵဵမ်ႊဢမ်ႇၼၼ်ၼႂ်းငၢဝ်းတူင်ႉၼၼ်ႉ တႄႉတႄႉ ၼႆယဝ်ႉ။