Microsoft ပိုတ်ႇတူဝ် Windows 10

ႁဵတ်းႁႂ်ႈၵၢၼ်လၢမ်းၶၢတ်ႈၶွင်သိုဝ်ႇၶၢဝ်ႇၽၢႆႇဢၢႆႇထီႇလၢႆၸုမ်း ၽိတ်းပိူင်ႈၵႂႃႇတင်းၼမ် မိူဝ်ႈၸုမ်း Microsoft ပိုတ်ႇတူဝ် OS တူဝ်မႂ်ႇၸိုဝ်ႈ Windows 10 တႅၼ်းတီႈတေပဵၼ် Windows 9 မိူဝ်ႈဝၼ်းထိ 30/09/14။ OS တူဝ်မႂ်ႇၼႆႉ ၶိုၼ်းဢဝ်ၶေႃႈလီၶွင် Windows 7 လႄႈ 8 မႃးႁူမ်ႈၵၼ်သေမီး features မႂ်ႇမိူၼ်ၼင်ႇ-

1. ၵၢၼ်ပွၵ်ႈမႃးၶွင် Start Menu

လွင်ႈတၢင်းမဵဝ်းၼိုင်ႈ ဢၼ်ၵူၼ်းတင်းၼမ်ဢမ်ႇသူင်ၸႂ်ႉ Windows 8 ဢမ်ႇၼၼ်ၶၢင်းပွင်ႉလွင်ႈ Windows 8 ၼၼ်ႉပဵၼ်ယွၼ်ႉ Start Menu ႁၢႆလၢႆၵႂႃႇ။ ၼႂ်း Windows 10 ၼႆႉ ၸုမ်း Microsoft ၶိုၼ်းသႂ်ႇမႃးပႃး Start Menu ဢၼ်မီးၽၢင်ႁၢင်ႈမိူၼ် Start Menu ၶွင် Windows 7 လႄႈ ၼႃႈႁိူၼ်း Start ၶွင် Windows 8 ႁူမ်ႈၵၼ် ၼႆယူႇ။

2. ပိုတ်ႇ Apps ၼႂ်း Desktop လႆႈ

ပူဝ်ႊၵႅမ်ႊ လႄႈ Apps ၼႂ်း Windows 8 ၼၼ်ႉ ဢမ်ႇႁဵတ်းၵၢၼ်ႁူမ်ႈၵၼ်။ ပိူင်တႅၵ်ႈမၼ်း ၽွင်းၽူႈဢၢၼ်ႇၶဝ် ပိုတ်ႇ App မႃးတူဝ်ၼိုင်ႈၼၼ်ႉ ၼႃႈၶွမ်းတေလႆႈၵႂႃႇပဵၼ် App Mode (တေဢမ်ႇႁၼ် Desktop)။ ၵူၺ်း OS တူဝ်မႂ်ႇၼႆႉ ၸၢင်ႈဢဝ် Apps မႃးပိုတ်ႇၼိူဝ် Desktop လႆႈ။ သင်လၢတ်ႈငၢႆႈငၢႆႈမၼ်းၼႆၸိုင် Apps ၼႂ်း Windows 10 ၼၼ်ႉ ႁဵတ်းၵၢၼ်မိူၼ်ၵၼ်တင်း ပူဝ်ႊၵႅမ်ႊတင်ႇၸိူဝ်းၼႂ်းၶွမ်း ၼႆယူႇ။

3. ၸႅၵ်ႇၽေပိုၼ်ႉတီႈ Desktop တႃႇႁဵတ်းၵၢၼ်လၢႆမဵဝ်းမိူဝ်ႈလဵဝ်ၵၼ်လႆႈၼမ်လိူဝ်ၵဝ်ႇ

လွင်ႈၸႅၵ်ႇၽေပိုၼ်ႉတီႈ Desktop တႃႇႁဵတ်းၵၢၼ်လၢႆမဵဝ်းမိူဝ်ႈလဵဝ်ၵၼ် ဢမ်ႇၼၼ် Multi-tasking ၼၼ်ႉ  Windows 8 ပၼ်ၸႅၵ်ႇၽေလႆႈ 2 ၽၢၵ်ႇ (မိူၼ်ၼင်ႇ မီး Desktop 2 ဢၼ်)။ ၵူၺ်း Windows 10 တူဝ်မႂ်ႇၼႆႉ ၽူႈၸႂ်ႉၶွမ်းၶဝ်ၸၢင်ႈၸႅၵ်ႇၽေပိုၼ်ႉတီႈႁဵတ်းၵၢၼ်ၼိူဝ် Desktop လႆႈၼမ်ထိုင် 4 ၽၢၵ်ႇ ၼႆယူႇ။



ယၢမ်းလဵဝ် Windows 10 ၼႆႉတိုၵ်ႉယူႇၼႂ်းၶၵ်ႉတွၼ်ႈတႃႇၽူႈတႅမ်ႈပူဝ်ႊၵႅမ်ႊၶဝ်လဵပ်ႈႁဵၼ်း (Preivew) လႄႈ တေမီးၵၢၼ်ပၼ်တၢဝ်ႊလူတ်ႊၸၢမ်းလဵၼ်ႈတူၺ်း ဝႆးဝႆးၼႆႉ ၼႆယဝ်ႉ။