ၽွင်းလူမ်းၼၢဝ်ၶိုၼ်ႈ တေလႆႈဢဝ် ၼမ်ႉဢုၼ်ႇႁိုဝ် ၼမ်ႉၵတ်းၸဵတ်ႉတူဝ်

မၢင်ၸိူဝ်းဝူၼ်ႉဝႃႈၼမ်ႉၵတ်း ၵမ်ႈၽွင်ႈဝႃႈၼမ်ႉဢုၼ်ႇ ၶေႃႈလႂ်ထုၵ်ႇလီႁဵတ်းၸွမ်းၵေႃႈဢမ်ႇႁူႉယဝ်ႉ ၼႆ။ ၵမ်ႈၽွင်ႈဢဝ် ၽႃႈၸႄႈၼႂ်းတူႈယဵၼ်ႁႂ်ႈမၼ်းၵတ်းၵတ်းသေ ၽွင်းမီးလူမ်းၼၢဝ်ၶိုၼ်ႈၼၼ်ႉ ဢဝ်မႃးႁူမ်ႇ ဝႆႉတီႈၼႃႈၽၢၵ်ႇဢမ်ႇၼၼ် ဢဝ်မႃးၸဵတ်ႉတူဝ်ဝႃႈၼႆ။ ၵူၺ်းၵႃႈလွၵ်းလၢႆးဢၼ်ထုၵ်ႇမႅၼ်ႈၼၼ်ႉတႄႉ ႁႂ်ႈဢဝ်ၼမ်ႉဢုၼ်ႇၸဵတ်ႉ။ ယွၼ်ႉဝႃႈၽႃႈတီႈ ၸုပ်ႉၼမ်ႉဢုၼ်ႇသေဢဝ်မႃးၸဵတ်ႉတူဝ်ၼၼ်ႉ မၼ်းတေ ႁဵတ်းႁႂ်ႈႁိူဝ်ႇၼႂ်းတူဝ်ၵူၼ်းႁဝ်းဢွၵ်ႇငၢႆႈလႄႈလူမ်းၼၢဝ်ၵေႃႈ တေယွမ်းလူင်း ၸွမ်းၼင်ဢၼ်ႁိူဝ်ႇၼႂ်းတူဝ် ႁဝ်းဢွၵ်ႇမႃး။

ပေႃးဢဝ်ၼမ်ႉၵတ်းၸဵတ်ႉတူဝ်ၸိုင် ယိုင်ႈၶႅၼ်းတေႁဵတ်းႁႂ်ႈလူမ်းၼၢဝ်သုင်၊ ယွၼ်ႉဝႃႈၼမ်ႉယဵၼ်ၼၼ်ႉ မၼ်းတေၵႂႃႇ ႁဵတ်းႁႂ်ႈမၢၵ်ႇႁႅင်းၼိူဝ်ႉ(ၵၢမ်ႈၼိူဝ်ႉ)လႄႈသဵၼ်ႈလိူတ်ႈၶွတ်ႇၵူၼ်းႁဝ်းၵတ်းၶႅင်သေႁဵတ်းႁႂ်ႈ လူမ်းမႆႈၼႂ်းတူဝ်ၵူၼ်းႁဝ်း မႆႈႁႅင်းၶိုၼ်ႈလိူဝ်ၵဝ်ႇ။

ဢိင်ၼိူဝ်လွင်ႈၼႆႉသေ သင်ၸိူဝ်ႉဝႃႈမီးလူမ်းၼၢဝ်ၸိုင် ႁႂ်ႈၵိၼ်ယႃႈယႃသေဢမ်ႇၵႃး ဢဝ်ၽႃႈၸုပ်ႉၼမ်ႉဢုၼ်ႇၸဵတ်ႉတူဝ် လႄႈ ၵိၼ်ၼမ်ႉဢုၼ်ႇၼမ်ၼမ် လွၵ်းလၢႆးၼႆႉတေႁဵတ်းႁႂ်ႈလူမ်းမႆႈၼႂ်းတူဝ်ယွမ်း လူင်း သေ ၸဵဝ်းၶႅၼ်း ဝႃႈၼႆယဝ်ႉ။