Apple ၶၢႆ iPhone 6 ႁူမ်ႈ 10 လၢၼ်ႉၶိူင်ႈၼႂ်းၶၢဝ်းတၢင်း 3 ဝၼ်း

ဝၢႆးသေဝၢင်းၶၢႆ iPhone 6 လႄႈ iPhone 6 Plus လႆႈ 3 ဝၼ်းၵူၺ်းၼၼ်ႉ ၸုမ်း Apple ပိုၼ်ၽၢဝ်ႇဝႃႈ မီးၵၢၼ် ၶၢႆဢွၵ်ႇၾူၼ်းမႂ်ႇၼႆႉ 10 လၢၼ်ႉၶိူင်ႈ ၼမ်လိူဝ်ၾူၼ်းၸိူဝ်းဢၼ်ပူၼ်ႉမႃးၵူႈသႅၼ်း ၼႆ။

ၸုမ်း Apple ပိုၼ်ၽၢဝ်ႇမိူဝ်ႈဝၼ်းထိ 22/09/14 မႃးဝႃႈ တင်ႈတႄႇမီးၵၢၼ်ဝၢင်းၶၢႆ iPhone 6 လႄႈ iPhone 6 Plus မိူဝ်ႈဝၼ်းထိ 12/09/14 မႃးၼႆႉ မီးၵၢၼ်ၶၢႆဢွၵ်ႇၾူၼ်းတင်းသွၼ်သႅၼ်းႁူမ်ႈ 10 လၢၼ်ႉၶိူင်ႈၼႂ်းၶၢဝ်းတၢင်း
3 ဝၼ်း၊ ၼမ်လိူဝ် iPhone 5s / 5c ဢၼ်ၶၢႆလႆႈ 9 လၢၼ်ႉၶိူင်ႈၼႂ်းၶၢဝ်းလဵဝ်ၵၼ်မိူဝ်ႈပီၵၢႆ ဝႃႈၼႆယူႇ။

ထိမ်ႊၶုၵ်ႊ (Tim Cook) ႁူဝ်ပဝ်ႈၸုမ်း Apple လၢတ်ႈဝႃႈ ယၢမ်းလဵဝ်ၶွမ်ႊပႃႊၼီႊ Apple မီးလွင်ႈၸတ်းၵၢၼ်ၼႂ်း ႁူင်းငၢၼ်းလီလိူဝ်ၵဝ်ႇ တႃႇႁႂ်ႈႁဵတ်းဢွၵ်ႇလႆႈ iPhone 6 လႄႈ iPhone 6 Plus တၼ်းၸွမ်းၽူႈၸိူဝ်းမႃးပႂ်ႉသိုဝ်ႉ ဢၼ်တိုၵ်ႉၵိုတ်းထႅင်ႈတင်းၼမ် ဝႃႈၼႆယူႇ။